იენს სტოლტენბერგი მხარს უჭერს სირიის რეჟიმის წინააღმდეგ აშშ-ს, დიდი ბრიტანეთისა და საფრანგეთის მოქმედებებს

ნატო-ს გენერალური მდივანი სირიაში გახორციელებულ მოვლენებს გამოეხმაურა. იენს სტოლტენბერგის განცხადებით,  ნატო მუდმივად გმობს სირიის მთავრობის მიერ ქიმიური იარაღის გამოყენებას, რაც საერთაშორისო ნორმებისა და შეთანხმებების აშკარა დარღვევაა. მისი თქმით,  ქიმიური იარაღის გამოყენება მიუღებელია და დამნაშავეებმა პასუხი უნდა აგონ. 

„მხარს ვუჭერ სირიის რეჟიმის წინააღმდეგ შეერთებული შტატების, დიდი ბრიტანეთისა და საფრანგეთის მოქმედებებს. ნატო ქიმიური იარაღის გამოყენებას განიხილავს როგორც საფრთხეს საერთაშორისო მშვიდობისა და უსაფრთხოებისადმი და მიიჩნევს, რომ „ქიმიური იარაღის კონვენციის“ დაცვა არსებითია“, – განაცხადა იენს სტოლტენბერგმა. 

დღეს, გამთენიისას, საერთაშორისო კოალიციამ, რომლის შემადგენლობაშიც აშშ, საფრანგეთი და დიდი ბრიტანეთი შედიან, სირიაში გარკვეულ ობიექტებზე დარტყმა მიიტანეს.